ഉഗ്രമൂര്‍ത്തികളെ പ്രതിഷ്ഠിച്ചിരിക്കുന്ന ക്ഷേത്രങ്ങളുടെ മുന്‍വശത്തും വലതുവശത്തും താമസയോഗ്യമായ ഗൃഹങ്ങള്‍ പണിയുന്നത് ശുഭകരമായിരിക്കില്ല.
ശാന്തഭാവത്തില്‍ നിലകൊള്ളുന്ന ദേവന്മാരുടെ ഇടതുവശത്തും പിന്‍ഭാഗത്തും ഗൃഹങ്ങള്‍ പണിത് പാര്‍ക്കാന്‍ പാടുള്ളതല്ല.
ക്ഷേത്രവാസികള്‍ മേല്‍പ്പറഞ്ഞ കാര്യങ്ങള്‍ ബാധകമല്ലെന്നതാണ് സത്യം.
വീടിന് കണ്ണേല്‍ക്കുമോ ?
നാവില്‍ ഗുളികന്‍ നില്‍ക്കുന്നവന്‍ ചിലനേരം ചിലത് പറഞ്ഞാല്‍ അപ്പാടെ സംഭവിക്കാറുണ്ട്. ഇതിന് 'കരിങ്കണ്ണ് എന്നാണ് പറയുക.
വീടിന്റെ പണിനടക്കുന്ന സമയം ഓലകള്‍കൊണ്ടും മറ്റും കെട്ടി മറയ്ക്കുന്നത് കണ്ടിട്ടില്ലേ ?
ചിലയിടങ്ങളില്‍ കുംബളങ്ങയിലും ചട്ടിയിലും മുറത്തിലും മറ്റും ആളിന്റെ വികൃതമുഖങ്ങള്‍ വരച്ചു വയ്ക്കുക, മറ്റു ചിലയിടങ്ങളില്‍ മനുഷ്യന്റെ കോലം ഉണ്ടാക്കി വയ്ക്കുക എന്നിവയും ചെയ്യാറുണ്ട്. കരിങ്കണ്ണന്‍മാരുടെ നോട്ടം കെട്ടിടത്തിനേല്‍ക്കാതെ ഈ കോലങ്ങള്‍ പിടിച്ചെടുക്കുമെന്നത്രെ വിശ്വാസം.
ഭൂനിരപ്പിനു താഴെയായി പണിതീര്‍ക്കപ്പെട്ട കെട്ടിടത്തെപ്പറ്റി
ഭൂനിരപ്പിനു താഴെയായി പണി തീര്‍ക്കപ്പെടുന്ന കെട്ടിടം ഒരിക്കലും താമസയോഗ്യമായിരിക്കില്ല. വായുസഞ്ചാരമില്ലായ്മയാണ് ഒരു കാരണം. ആ കെട്ടിടം കച്ചവടത്തിന് അത്രയ്ക്ക് കുഴപ്പമില്ല. എങ്കിലും സാധനങ്ങള്‍ ശേഖരിച്ചുവെയ്ക്കാന്‍ അത്യുത്തമമാണ്.
നഗരത്തിലെ ബഹുനിലക്കെട്ടിടങ്ങളില്‍ പാര്‍ത്താല്‍..
നഗരപ്രദേശങ്ങളില്‍ കെട്ടിടങ്ങള്‍ എങ്ങനെയും തീര്‍ക്കാമെന്നതാണ് പലരുടെയും ധാരണ. എന്നാല്‍ ആ ധാരണ തികച്ചും തെറ്റാണ്. വാസ്തുശാസ്ത്രവിധിപ്രകാരമുള്ള കണക്കുകളെ മാനിക്കാതെ നിര്‍മ്മിക്കുന്ന ബഹുനിലക്കെട്ടിടങ്ങളില്‍ പാര്‍ക്കുന്ന ജനങ്ങള്‍ രോഗാരിഷ്ടതകള്‍, സ്വസ്ഥതകുറവ്, സന്താനദുരിതം മുതലായവ മൂലം വിഷമിക്കുന്നതാണ്. പൊതുവെ അശാന്തിയായിരിക്കും ഫലം. എന്നാല്‍ വാടകയ്ക്ക് താമസിക്കുന്നവരെ ഗൃഹദോഷം സാരമായി ബാധിക്കാറില്ല.
