പ്രഥിതശ്ചതുരോടനോല്പവിത്തഃ
ക്രിയഗേ ത്വായുധഭൃദ്വിതുംഗഭാഗേ
ഗവി വസ്ത്രസുഗന്ധപണ്യജീവീ
വനിതാദ്വിൾ കുശലശ്ച ഗേയവാദ്യേ.
സാരം :-
ജനനസമയത്തു സൂര്യൻ മേടം രാശിയിൽ തന്റെ പരമോച്ചത്തിലല്ലാതെ മറ്റെവിടേയെങ്കിലും നിന്നാൽ, ലോകപ്രസിദ്ധനും ഏതു കാര്യത്തിനും സമർത്ഥനും എപ്പോഴും ലോകസഞ്ചാരിയും ഉപജീവനത്തിനു അത്യാവശ്യം മാത്രം സ്വത്തുള്ളവനും വില്ല് അമ്പ് തോക്ക് മുതലായ ആയുധവിദ്യകളിൽ സമർത്ഥനുമായിരിക്കും. സൂര്യൻ തന്റെ പരമോച്ചത്തിൽ നിന്നാലത്തെ ഫലം രാജയോഗ അദ്ധ്യായത്തിൽ പറഞ്ഞിട്ടുണ്ടല്ലോ.
സൂര്യൻ ഇടവം രാശിയിൽ നിൽക്കുമ്പോൾ ജനിച്ചവൻ, വസ്ത്രങ്ങളേയും കൽപ്പൂരം കസ്തൂരി മുതലായ സുഗന്ധദ്രവ്യങ്ങളേയും കച്ചവടം ചെയ്തു ദിവസവൃത്തി കഴിയ്ക്കുന്നവനും, സ്ത്രീകളെ ദ്വേഷിയ്ക്കുന്നവനും, സകല പ്രവൃത്തികളിലും സമർത്ഥനും, വിശേഷിച്ച് പലവിധഗാനവിദ്യയിലും പല പ്രകാരത്തിലുള്ള വാദ്യവിദേഷങ്ങളിലും അതിസമർത്ഥനും ആയിരിയ്ക്കുന്നതാണ്.
