ചന്ദ്രൻ മീനം രാശിയിൽ നിന്നാലത്തെ ഫലം പറയുന്നു

ജലചരധനഭോക്താ ദാരവാസോനുരക്ത-

സ്സമരുചിരശരീരസ്തുംഗനാസോ ബൃഹൽകഃ

അഭിഭവതി സപത്നാൻ സ്ത്രീജിതശ്ചാരുദൃഷ്ടിർ-

ദ്ദ്യുതിനിധിധനഭോഗീ പണ്ഡിതശ്ചാന്ത്യരാശൌ.

സാരം :-

ജനനകാലത്ത് ചന്ദ്രൻ മീനം രാശിയിൽ നിന്നാൽ ജലജന്തുക്കളിൽ നിന്നു ലഭിയ്ക്കുന്ന മുത്ത് പവിഴം ശംഖ് മുതലായവകളേയും, കപ്പൽ തോണി മുതലായവയിൽ കൊണ്ടുനടക്കുന്ന മറ്റു പദാർത്ഥങ്ങളേയും കച്ചവടം ചെയ്തുണ്ടാക്കിയ ധനം അനുഭവിയ്ക്കുന്നവനായിരിയ്ക്കുക, ഭാര്യമാരിലും നല്ല വസ്ത്രങ്ങളിലും വലിയ താല്പര്യമുണ്ടാവുക, അവയവങ്ങൾക്കു ഏറ്റക്കുറച്ചിൽ കൂടാതെ സമവിഭക്തവും മനോഹരവുമായ ദേഹത്തോടുകൂടിയവനും മൂക്കിനു അല്പം ഉയർച്ചയും തലയ്ക്കു സാധാരണയിൽ കുറച്ചധികം വലുപ്പമുള്ളവനും ആയിരിയ്ക്കുക, ശത്രുക്കളെ ജയിയ്ക്കുന്നവനും സ്ത്രീകൾക്ക് അധീനനുമാവുക, കണ്ണുകൾക്കു നല്ല ഭംഗിയുണ്ടാവുക. സ്വതേജസ്സുകൊണ്ടും നിധിലാഭംമൂലവും ധനം സമ്പാദിയ്ക്കുകയും അതു അനുഭവിയ്ക്കുകയും ചെയ്ക, വിദ്വാനായിരിയ്ക്കുക ഈ ഫലങ്ങളൊക്കെ അനുഭവിയ്ക്കുന്നതാകുന്നു.