മന്ദഃ സ്വാൽ ത്രിസുതാപ്തിശത്രുഷു ശുഭഃ
സാജ്ഞാന്ത്യഗോ ഭൂമിജാൽ
കേന്ദ്രായാഷ്ടധനേഷ്വിനാദുപചയേഷ്വാദ്യേ
സുഖേ ചോദയാൽ
ധർമ്മായാരിദശാന്ത്യമൃത്യുഷു ബുധാ-
ച്ചന്ദ്രാൽ ത്രിഷഡ്ലാഭഗഃ
ഷഷ്ഠാന്ത്യായഗതസ്സിതാൽ സുരഗുരോഃ
പ്രാപ്ത്യന്ത്യധീശത്രുഷു.
സാരം :-
തന്നാൽ ആശ്രിതമായ രാശിയുടെ മൂന്നാം ഭാവത്തിലും അഞ്ചാം ഭാവത്തിലും പതിനൊന്നാം ഭാവത്തിലും ആറാം ഭാവത്തിലും, ചൊവ്വയാൽ ആശ്രിതമായ രാശിയുടെ മേൽപ്പറഞ്ഞ സ്ഥാനങ്ങളിലും പത്താം ഭാവത്തിലും പന്ത്രണ്ടാം ഭാവത്തിലും, സൂര്യനാൽ ആശ്രിതമായ രാശിയിലും അതിന്റെ ചതുർത്ഥസപ്തമദശമങ്ങളിലും ഏകാദശാഷ്ടമദ്വിതീയങ്ങളിലും ലഗ്നത്തിലും അതിന്റെ മൂന്നാം ഭാവത്തിലും ആറാം ഭാവത്തിലും പത്താം ഭാവത്തിലും പതിനൊന്നാം ഭാവത്തിലും, ബുധനാൽ അശ്രിതമായ രാശിയുടെ ഒമ്പതാം ഭാവത്തിലും പതിനൊന്നാം ഭാവത്തിലും ആറാം ഭാവത്തിലും പത്താം ഭാവത്തിലും പന്ത്രണ്ടാം ഭാവത്തിലും അഷ്ടമത്തിലും, ചന്ദ്രനാൽ ആശ്രിതമായ രാശിയുടെ തൃതീയഷഷ്ഠലാഭങ്ങളിലും, ശുക്രനാൽ ആശ്രിതമായ രാശിയുടെ ആറാം ഭാവത്തിലും പന്ത്രണ്ടാം ഭാവത്തിലും പതിനൊന്നാം ഭാവത്തിലും, വ്യാഴത്താൽ ആശ്രിതമായ രാശിയുടെ പതിനൊന്നാം ഭാവത്തിലും പന്ത്രണ്ടാം ഭാവത്തിലും അഞ്ചാം ഭാവത്തിലും ആറാം ഭാവത്തിലും സഞ്ചരിച്ചിയങ്ങുന്ന ശനി ശുഭനാകുന്നു. ഇങ്ങനെ മന്ദാഷ്ടകവർഗ്ഗം. സർവ്വത്ര അനുക്തസ്ഥാനങ്ങളിൽ അതാതു ഗ്രഹങ്ങൾ അശുഭദന്മാരാകുന്നു എന്നറിഞ്ഞുകൊൾകയും വേണം.