യജ്വാർത്ഥഭാക്സതതമദ്ധ്വരുചിർഗ്ഗദായാം
തദ് വൃത്തിദുക്ച്ഛകടജസ്സരുജഃ കുദാരഃ
ദൂതോടനഃ കലഹകൃദ്വിഹഗേ പ്രദിഷ്ടഃ
ശൃംഗാടകേ ചിരസുഖീ കൃഷികൃദ്ധലാഖ്യേ.
സാരം :-
ഗദായോഗജാതൻ വിധിയ്ക്കനുസരിച്ച് യാഗാദികർമ്മങ്ങളെ ചെയ്കയും, എല്ലായ്പോഴും ധനം ധാരാളമായി കയ്യിലുണ്ടായിരിയ്ക്കയും, എല്ലായ്പോഴും വഴി നടപ്പാൻ ആഗ്രഹമുള്ളവനായിരിയ്ക്കുകയും ചെയ്യും.
നാല്കാലികളെക്കെട്ടി വണ്ടി വലിപ്പിച്ചും താൻതന്നെ വലിച്ചും ദിവസവൃത്തി കഴിയ്ക്കുക, രോഗിയായിരിയ്ക്കുക, കുത്സിതഭാര്യയുണ്ടായിരിയ്ക്കുക ഇതെല്ലാം ശകടയോഗജാതൻ അനുഭവിയ്ക്കുന്ന ഫലങ്ങളാണ്.
വിഹഗയോഗജാതൻ എഴുത്തു മുതലായ സന്ദേശങ്ങളെ ഒരുവനിൽ നിന്ന് മറ്റൊരുവന്നു എത്തിയ്ക്കുന്നവനും പ്രകൃത്യാ എപ്പോഴും വഴി നടപ്പാൻ ആഗ്രഹമുള്ളവനും കലഹിപ്പിയ്ക്കുന്നവനുമായിരിയ്ക്കും.
ശൃംഗാടകയോഗജാതൻ അനേകകാലം സുഖിച്ചിരിയ്ക്കും.
ഹലയോഗജാതൻ വലിയ കൃഷിക്കാരനാവും.