ഭ്രഷ്ടസ്യ തുംഗാദവരോഹി സംജ്ഞാ
മധ്യാ ഭവേത് സാ സുഹൃദുച്ചഭാംശേ
ആരോഹിണീ നിമ്നപരിച്യുതസ്യ
നീചാരിഭാംശേഷ്വധമാ ഭവേത് സാ.
പരമോച്ചം കഴിഞ്ഞ് നീചാഭിമുഖമായി സഞ്ചരിക്കുന്ന ഗ്രഹത്തിന്റെ ദശയ്ക്ക് "അവരോഹിണി" (കീഴ്പ്പോട്ട് ഇറങ്ങിപ്പോകുന്നത്) എന്ന് സംജ്ഞയുണ്ട്. അതനുസരിച്ച് ആ ദശയിൽ അശുഭഫലങ്ങൾ പിന്നെപ്പിന്നെ കൂടുതലായി അനുഭവിയ്ക്കുകയും ചെയ്യും. ഈ അവരോഹിണീ ദശാധിപനുതന്നെ ബന്ധുക്ഷേത്രസ്ഥിതിയോ, ബന്ധുക്ഷേത്രം ഉച്ചം ഇതിലൊന്നിൽ അംശകമോ ഉണ്ടെങ്കിൽ ആ ദശയ്ക്ക് "മദ്ധ്യാ" എന്നാണ് സംജ്ഞ. അതിൽ ശുഭഫലവും അശുഭഫലവും സാമാന്യമായി ഇടകലർന്നു അനുഭവമാകും. നേരെ മറിച്ച് പരമനീചം കഴിഞ്ഞ് ഉച്ചാഭിമുഖമായി പ്രയാണം ചെയ്യുന്നതിന്റെ ദശയ്ക്കുള്ള സംജ്ഞ "ആരോഹിണി" (കയറുന്നത്) എന്നും, ആ ദശ പിന്നെപ്പിന്നെ ദേഹസുഖം ധനം ഭാര്യാസന്താനാദി സൽഫലങ്ങൾ എന്നിവ പ്രദാനം ചെയ്യുന്നതുമാകുന്നു. ഈ ആരോഹിണി ദശാനാഥനുതന്നെ നീചരാശി ശത്രുക്ഷേത്രം എന്നിവകളിലൊന്നിൽ അംശമോ ശത്രുക്ഷേത്രസ്ഥിതിയോ ഉണ്ടെങ്കിൽ ആ ദശയ്ക്ക് "അധമ' എന്ന് സംജ്ഞയുള്ളതും , ഇതിൽ സ്വല്പം മാത്രം ശുഭവും അത്യന്തം അശുഭവും അനുഭവിയ്ക്കുന്നതുമാണ്.
