ഹയാകൃതിഃ പാണ്ഡരമാല്യശേഖരോ
ബിഭർത്തി കൃഷ്ണാജിനകംബളം നരഃ
ദുരാസദസ്സിംഹ ഇവാത്തകാർമ്മുകോ
നതാഗ്രനാസോ മൃഗരാജമദ്ധ്യമഃ
ചിങ്ങം രാശിയുടെ രണ്ടാം ദ്രേക്കാണസ്വരൂപം, കുതിരയുടേതുപോലെ അതിദീർഘശരീരത്തോടുകൂടിയും കൃഷ്ണമൃഗത്തോലും കരിമ്പടവും ധരിച്ചും ശിരോലങ്കാരമായി വെളുത്ത പൂമാലയണിഞ്ഞും കയ്യിൽ വില്ലെടുത്തും പതിഞ്ഞ നാസികാഗ്രത്തോടുകൂടിയുമിരിയ്ക്കുന്ന സിംഹത്തെപ്പോലെ അടുക്കുവാൻ വയ്യാത്ത വിധത്തിൽ അതിതേജസ്വിയായ ഒരു പുരുഷന്റെതാണ്. ഇവിടെയുള്ള "ഹയാകൃതി " ശബ്ദംകൊണ്ടു ദേഹത്തിന്റെ ഉയരത്തെ മാത്രമാണു കാണിച്ചിട്ടുള്ളതെന്നറിയുക. ഇതു മനുഷ്യദ്രേക്കാണവും സായുധവുമാകുന്നു.
