ലക്ഷണശാസ്ത്രത്തിലും രേഖാശാസ്ത്രത്തിലും ബിന്ദുക്കൾ (മറുക്)ക്ക് പ്രാധാന്യമുണ്ട്. ബിന്ദുക്കൾ തേൻ നിറമുള്ളതും കറുപ്പുനിറമുള്ളതും അങ്ങനെ രണ്ടുവിധമാകുന്നു. ഇതിൽ തേനിന്റെ നിറമുള്ളത് ശുഭകരവും കറുപ്പുനിറമുള്ളത് അശുഭകരവുമത്രെ. പുരുഷന്മാരുടെ ദേഹത്ത് തേൻ നിറമുള്ള പുള്ളികൾ അല്പംകൂടെ ചുവപ്പുകലർന്നതായിരിക്കും. അതിനാൽ ഇവിടെയതിനെ ചുവപ്പു ബിന്ദുക്കളായി വ്യവഹരിക്കാം. ചില ബിന്ദുക്കൾ അരിമ്പാറപോലെ തടിച്ചതുമായിരിക്കും.
നെറ്റിയുടെ മദ്ധ്യഭാഗത്ത് തിലകം ചാർത്തുന്ന സ്ഥാനത്തുള്ള കറുത്തതും ചുവന്നതുമായ മറുക് പുരുഷന് ശുഭമാകുന്നു.
നെറ്റിയുടെ മുകളിലോ ഇടതും വലതും അരികുകളിലോ കറുത്ത ബിന്ദുക്കൾ അശുഭവും ചുവന്നവ ശുഭവുമാകുന്നു. പുരികങ്ങളുടെ മേൽഭാഗത്തോ പുരികങ്ങളിലോ കറുത്ത മറുകുള്ളവൻ (ബിന്ദുക്കൾ) വിവേകിയാകുന്നു.
രണ്ടു പുരികങ്ങളുടേയും ഇടയിലുള്ള കറുത്ത മറുക് ദാരിദ്ര്യലക്ഷണവും ചുവന്നവ നപുംസകലക്ഷണവുമാണ്.
കണ്‍പോളകളിൽ വലത്തേതിൽ ഏതെങ്കിലും നിറമുള്ള മറുകുണ്ടായിരുന്നാലവൻ സൂക്ഷ്മദൃക്കും ഇടത്തേതിലാണെങ്കിൽ ദരിദ്രനുമാകുന്നു.
ചെവികളുടെ അകത്തോ പുറത്തോ മറുകുള്ളവൻ അഹങ്കാരിയാണ്. ചുവന്നതാണെങ്കിലവൻ ധനികനും സഹൃദയനുമായിരിക്കും.
കഴുത്തിന്റെ മറുവശം മുടിയോടു ചേർന്ന് കറുത്തതോ ചുവന്നതോ ആയ മറുകുണ്ടെങ്കിലാ പുരുഷൻ കർമ്മനിരതനും ധനികനും എന്നാൽ സന്താനഹീനനുമായിരിക്കും.
വലതുകവിൾത്തടത്തിലെ കറുത്തതും ചുവന്നതുമായ മറുക് പുരുഷനലങ്കാരവും ശുഭവും ആകുന്നു. ഇടതുകവിളിലാണെങ്കിൽ അശുഭം.
മൂക്കിന്റെ നടുക്കോ വശങ്ങളിലോ അഗ്രഭാഗത്തോ പുരുഷനു മറുകുണ്ടെങ്കിൽ അതു കറുപ്പോ ചുവപ്പോ ആയാലും അതു ശുഭകരമല്ല.
മേൽ ചുണ്ടിനു മുകളിൽ കറുത്ത മറുകുള്ളവൻ അഹങ്കാരിയും ചുവന്ന മറുകുള്ളവൻ ധനികനും ദയാലുവുമായിരിക്കും.
താടിയിലോ താഴത്തെ ചുണ്ടിനോടു ചേർന്നോ ഏതെങ്കിലും നിറത്തിൽ മറുകുള്ളത് ശുഭകരമാണ്.
കഴുത്തിൽ കറുത്ത പുള്ളിയുള്ളവൻ കണ്ഠക്ഷോഭം ചെയ്യുന്നവനും ചുവന്ന മറുകുള്ളവൻ അരസികനുമായിരിക്കും.
പുരുഷന്റെ വലത്തേത്തോളത്തെ കറുത്തതോ ചുവന്നതോ ആയ മറുക് ധനലക്ഷണവും, ഇടത്തേതോളിലുള്ളത് കപടലക്ഷണവുമാണ്.
കക്ഷങ്ങളിൽ ഏതെങ്കിലും നിറത്തിൽ മറുകുണ്ടായിരിക്കുന്ന പുരുഷൻ സമർത്ഥനും വിവേകിയുമത്രെ.
പുരുഷന്റെ കൈത്തണ്ടകളിലും മുട്ടുകളിലും ഉള്ള കറുത്തതും ചുവന്നതുമായ മറുക് ശുഭകരമല്ല.
കൈപ്പത്തിയിൽ ഇടത്തേതിന്റെ ലക്ഷണം രേഖാശാസ്ത്രനിയമപ്രകാരം പരിഗണനാർഹമല്ല. വലതുകൈപ്പത്തിയിൽ പുറത്ത് വലതു ഭാഗത്തുള്ള കറുപ്പു ബിന്ദുക്കൾ (മറുകുകൾ) അശുഭകരവും ചുവന്നത് ശുഭകരവും ആകുന്നു. ഇടതുഭാഗത്താണെങ്കിൽ രണ്ടു നിറവും ഗുണകരമായിരിക്കയില്ല.
തള്ളവിരലിന്റേയും ചൂണ്ടുവിരലിന്റേയും ഇടയ്ക്കുള്ള സമതലത്തിലും കങ്കണപ്രദേശത്തുമുള്ള രണ്ടുനിറം മറുകുകളും ശുഭകരമാകുന്നു. ഇവൻ വിവേകിയും സന്മാർഗ്ഗചാരിയുമായിരിക്കും.
തള്ളവിരലിന്റെ പുറത്തോ ചെറുവിരലിന്റെ ചുവട്ടിലോ പുറത്തോ ഉള്ള കറുത്ത മറുക് ധനമഹിമയേയും ഹൃദയവിശാലതയേയും, ചുവന്നവ കാമലമ്പടത്വത്തേയും സൂചിപ്പിക്കുന്നു. മറ്റു വിരലുകളിലെ മറുകുകൾ ശുഭലക്ഷണമല്ല.
ഉള്ളം കയ്യിലെ മണിബന്ധത്തോടു ചേർന്നോ ഇടതുഭാഗത്തോ കാണുന്ന മറുക് ധനപ്രമത്തതേയും കറുത്തത് അധികാരദുർവ്വിനിയോഗത്തേയും വിളിച്ചറിയിക്കുന്നവയാകുന്നു.
ഉള്ളംകയ്യുടെ ഇടതരികിലോ തള്ളവിരലിനകത്തോ ഏതു നിറത്തിൽ മറുകുണ്ടെങ്കിലും അവൻ വിദ്വാനും ഉള്ളം കയ്യുടെ നടുമദ്ധ്യമുണ്ടായിരുന്നാലവൻ ഗ്രന്ഥകാരനും സഹൃദയനുമായിരിക്കും.
നെഞ്ചിൽ വലതുഭാഗത്തെ മറുകുകൾ ശുഭകരവും ഇടതുഭാഗത്തേത് അശുഭകരവുമാകുന്നു.
വയറ്റത്തോ പള്ളകളിലോ അടിവയറ്റിലോ മറുകുകളുള്ള പുരുഷൻ ദയാലുവും ദരിദ്രനുമായിരിക്കും.
ലിംഗത്തിന്റെ മേൽതട്ടിലോ ലിംഗത്തിന്മേലോ കറുത്ത മറുകുള്ളവൻ കാമചാരിയാകുന്നു. ഇവിടെ ചുവന്ന മറുകിന്റെ കാര്യം പറയുന്നില്ല.
തുടകളിൽ കറുത്തതോ ചുവന്നതോ ആയ മറുകുള്ള പുരുഷൻ വിവേകിയാണ്. കാൽ മുട്ടുകളിലോ കണങ്കാലുകളിലോ ചുവന്ന മറുകുള്ളത് ശുഭകരവും കറുത്ത മറുക് അശുഭകരവുമാകുന്നു.
ഉപ്പുകുറ്റിയുടെ വലതുവശത്തെ മറുകുകൾ ശുഭവും, ഇടതുവശത്തേത് അശുഭവുമത്രെ.
കാലിന്റെ വലതുപത്തിയിൽ വലതുവശത്തുള്ള രണ്ടു നിറം മറുകുകളും ശുഭകരവും ഇടതുവശത്തെ ചുവന്ന മറുക് കലാപരവും, കറുത്തത് ദാരിദ്ര്യപരവുമാണ്.
വലതുകാലിന്റെ തള്ളവിരലിന്റെ പുറത്ത് കറുത്ത മറുക് ശുഭകരവും മറ്റെവിടെയായിരുന്നാലും അശുഭവുമാകുന്നു. ഇവിടേയും ചുവന്ന മറുകിനെ വിവക്ഷിക്കുന്നില്ല.
