ഗതിമപി രിപുരന്ധ്രത്യംശപോƒസ്തസ്ഥിതോ വാ
ഗുരുരഥ രിപുകേന്ദ്രച്ഛിദ്രഗസ്സ്വോച്ചസംസ്ഥഃ
ഉദയതി ഭവനേƒന്ത്യേ സൌമ്യഭാഗേ ച മോക്ഷോ
ഭവതി യദി ബലേന പ്രോജ്ഝിതാസ്തത്ര ശേഷാ.
സാരം :-
പതിനാറാം ദ്രേക്കാണാധിപൻ, ഇരുപത്തിരണ്ടാം ദ്രേക്കാണാധിപൻ, ലഗ്നാൽ ആറ് ഏഴ് എട്ട് (ഇവിടെ "അസ്തസ്ഥിതോവാ" എന്ന ദിക്കിലെ വാ ശബ്ദംകൊണ്ടു 6 - 8 എന്നീ ഭാവങ്ങളിൽ നില്ക്കുന്നവരേയും ഗ്രഹിയ്ക്കേണ്ടതാണ്. "രിപുരന്ധ്രത്ര്യംശകപാ നയന്തി ചാസ്താരിനിധനസ്ഥാഃ എന്നു പ്രമാണവചനവുമുണ്ട്) എന്നീ ഭാവങ്ങളിൽ നിൽക്കുന്നവർ ഈ ഗ്രഹങ്ങളിൽവെച്ചു അധികബലവാനെക്കൊണ്ടാണ് പരലോകഗതിയെ - ഇനിയത്തെ ജനനത്തിന്റെ സ്വഭാവത്തെ - ചിന്തിയ്ക്കേണ്ടത്. ആ ഗ്രഹത്തെക്കൊണ്ടുള്ള ചിന്താരീതിതന്നെ മുൻശ്ലോകപ്രകാരമാണുതാനും. എങ്ങനെയെന്നാൽ ആ ബലാധികഗ്രഹം വ്യാഴമായാൽ ഇനിയത്തെ ജനനം ദേവനായിട്ടും, അതു ചന്ദ്രനോ ശുക്രനോ ആയിരുന്നാൽ മനുഷ്യനായിട്ടും, സൂര്യനോ ചൊവ്വയോ ആരിയുന്നാൽ നരകജീവിയായിട്ടും ആണ് മരണാനന്തരം ആ ജീവൻ പരിണമിയ്ക്കുക എന്നു സാരം.
ഉദയലഗ്നത്തിന് അന്ത്യാംശംവരിക, വ്യാഴം തന്റെ പരമോച്ചത്തിൽ ലഗ്നം നാല് ആറ് എട്ട് പത്ത് എന്നീഭാവങ്ങളിൽ ഒന്നിൽ നില്ക്കുക, വ്യാഴം ഒഴിച്ചു മറ്റെല്ലാ ഗ്രഹങ്ങൾക്കും ഒട്ടും ബലമില്ലാതെ ഇരിയ്ക്കുകയും ചെയ്ക. ഈ യോഗസമയത്താണ് ജനനമെങ്കിൽ അയാൾക്ക്‌ ഇനി ജന്മമേ ഉണ്ടാവാത്ത വിധത്തിലുള്ള മോക്ഷപ്രാപ്തിയാണെന്നു പറയണം. ഈ യോഗത്തെ മരണസമയത്തും കല്പിയ്ക്കാമെന്നു ആചാര്യന്മാർ " അപി " ശബ്ദംകൊണ്ടു സൂചിപ്പിച്ചതായി ചിലർ പറഞ്ഞുകാണുന്നുണ്ട്. മരണസമയത്ത് മേൽപറഞ്ഞ യോഗമുണ്ടായാലും മോക്ഷപ്രാപ്തിയാണെന്നു സാരം. ഈ മോക്ഷപ്രാപ്തിയോഗത്തെ രണ്ടാക്കി ചിലർ കല്പിച്ചുകാണ്മാനുണ്ട്. അവ എങ്ങനെയെന്നാൽ 1). വ്യാഴം തന്റെ പരമോച്ചത്തിൽ 6 - 8 ലഗ്നകേന്ദ്രം ഇവിടങ്ങളിൽ ഒരേടത്തു നില്ക്കുക; 2). വ്യാഴം മാത്രം ബലവാനും മറ്റെല്ലാഗ്രഹങ്ങളും ബലഹീനന്മാരുമാവുക, ഉദയലഗ്നത്തിനു അന്ത്യാംശം വരികയും ചെയ്ക, മേൽകാണിച്ച വിധത്തിലാണ് രണ്ടു യോഗമാക്കീട്ടുള്ളത്‌. " ച " ശബ്ദം ഈ യോഗത്തെക്കുറിച്ചുള്ള വൈകല്പികമാണെന്നാണ് ഇവരുടെ അഭിപ്രായമെന്നും അറിയണം.
