അഷ്ടമസ്ഥേ വിധോഃ പുത്രേ ഭംഗ ഇഷ്ടസ്യ കർമ്മണഃ
മൂലാംശേ പൂഗതാംബൂലനാശോƒഭാവോഥവാƒനയോഃ
ധാത്വംശേ വപുഷഃ സാദോ വാച്യോ ജീവാംശകേ പുനഃ
പാരുഷ്യം വചസശ്ചൂർണ്ണാഭാവോ വാ ഗതവിദ്ദിനേ.
മുൻപറഞ്ഞവണ്ണം അഷ്ടമരാശിയിൽ ബുധൻ നിന്നാൽ കഴിഞ്ഞ അടുത്ത ബുധനാഴ്ച ദിവസം ഇഷ്ടകാര്യസാദ്ധ്യത്തിനു തടസ്സമുണ്ടായിയെന്നുപറയണം. ആ ബുധന്റെ നവാംശകം മൂലരാശിയിലാണെങ്കിൽ കഴിഞ്ഞ ബുധനാഴ്ച്ച വെറ്റിലയും പാക്കും കളഞ്ഞു പോകുകയോ അല്ലെങ്കിൽ അതുകൾ കിട്ടാതിരിക്കുകയോ ചെയ്തു എന്നു പറയണം. ആ ബുധൻ ധാതുരാശി നവാംശകത്തിലാണെങ്കിൽ അന്നു ശരീരത്തിന് ആലസ്യമുണ്ടായി എന്നു പറയണം. അതുപോലെ ബുധൻ ജീവരാശി നവാംശകത്തിലാണെങ്കിൽ കഴിഞ്ഞ ബുധനാഴ്ച ചീത്തവാക്കു പറവാനിടവരികയോ മുറുക്കുന്നതിനു നൂറു കിട്ടാതിരിക്കുകയോ ഉണ്ടായിട്ടുണ്ടെന്നു പറയണം. ബുധന്റെ അഷ്ടമ സ്ഥിതികൊണ്ടു കഴിഞ്ഞ ബുധനാഴ്ച പ്രഷ്ടാവിനുണ്ടായിട്ടുള്ള അനുഭവമാണ് പറഞ്ഞിട്ടുള്ളത്.