ശൂലംകൊണ്ടു ദേഹം പിളർന്ന് മരിയ്ക്കുന്നതാണ് / ദേഹത്തിൽ മരം മരക്കൊമ്പ് തുടങ്ങിയുള്ളവ വീഴുകയാലോ വടി വിറകുകൊള്ളി ഇത്യാദികളെക്കൊണ്ടു അടികൊണ്ടിട്ടോ മരിയ്ക്കുന്നതാണ്

ശൂലോദ്ഭിന്നതനുസ്സുഖേവനിസുതേ

സൂര്യേപി വാ ഖേ യമേ

സപ്രക്ഷീണഹിമാംശുഭിശ്ച യുഗപൽ

പാപൈസ്ത്രികോണാദ്യഗൈഃ

ബന്ധുസ്ഥേ ച രവൌ വിയത്യവനിജേ

ക്ഷീണേന്ദുസംവീക്ഷിതേ

കാഷ്ഠേനാഭിഹതഃ പ്രയാതി മരണം

സൂര്യാത്മജേനേക്ഷിതേ.

സാരം :-

1. സൂര്യകുജന്മാരിൽ ഒരു ഗ്രഹം നാലാംഭാവത്തിലും ശനി പത്താംഭാവത്തിലും നില്ക്കുക, ഈ യോഗസമയത്തു ജനിച്ചവൻ ശൂലംകൊണ്ടു കുത്തുകൊള്ളുക, ശൂലത്തിന്മേൽ ഇടുക ഇത്യാദി കാരണങ്ങളാൽ ശൂലംകൊണ്ടു ദേഹം പിളർന്ന് മരിയ്ക്കുന്നതാണ്.
2. ലഗ്നം അഞ്ച് ഒമ്പത് എന്നീ മൂന്നു ഭാവങ്ങളിലും കൂടി ക്ഷീണചന്ദ്രൻ സൂര്യൻ ചൊവ്വ ശനി എന്നീ നാലു ഗ്രഹങ്ങളും നില്ക്കുക, ഈ യോഗസമയത്ത് ജനിച്ചാലും മുൻയോഗത്തിനു പറഞ്ഞപ്രകാരം ശൂലംകൊണ്ടു ദേഹം പിളർന്നു മരിയ്ക്കും.
3. നാലാംഭാവത്തിൽ സൂര്യനും പത്താം ഭാവത്തിൽ കുജനും നില്ക്കുകയും ഈ കുജനു ക്ഷീണചന്ദ്രന്റെ ദൃഷ്ടി ഉണ്ടാവുകയും ചെയ്ക, ജാതകത്തിൽ ഈ യോഗമുണ്ടായാലും, മേൽപ്പറഞ്ഞ രണ്ടു യോഗങ്ങൾക്കു പറഞ്ഞപ്രകാരം - ശൂലംകൊണ്ടു ദേഹം പിളർന്നു - മരിയ്ക്കുന്നതാണ്.
4. നാലാം ഭാവത്തിൽ സൂര്യനും പത്താം ഭാവത്തിൽ കുജനും നില്ക്കുകയും ഈ കുജനു ശനിദൃഷ്ടി ഉണ്ടാവുകയും ചെയ്ക, ഈ യോഗസമയത്ത് ജനിച്ചവന്റെ ദേഹത്തിൽ മരം മരക്കൊമ്പ് തുടങ്ങിയുള്ളവ വീഴുകയാലോ വടി വിറകുകൊള്ളി ഇത്യാദികളെക്കൊണ്ടു അടികൊണ്ടിട്ടോ മരിയ്ക്കുന്നതാണ്.

മൂന്നാമത്തെ യോഗത്തിൽ ക്ഷീണചന്ദ്രന്റെയും നാലാംയോഗത്തിൽ ശനിയുടേയും ദൃഷ്ടി ലഗ്നത്തിലാണ് ഉണ്ടാവേണ്ടത് എന്നും ഒരു അഭിപ്രായം കാണുന്നുണ്ട്