ദോഷാഃകേവലമേവ ചേദ്വിപദതീവാരാദ്വിനിര്‍ദ്ദിശ്യതാം
പ്രശ്നേ കേവലമേവ ചേല്‍ ഖലു ഗുണാ വാച്യാസ്തഥാ സംപദഃ
മിശ്രത്വേ ഗുണദോഷയോരധിഗതാമാലോച്യ വാച്യം ഫലം
യദ്വാ ദോഷജമേവ ഭാഗ്യവികലാഃ പ്രായോത്രലോകാ യതഃ
പ്രശ്നം കൊണ്ടും മറ്റും ചിന്തിക്കുമ്പോള്‍ ഏറ്റവും ദോഷങ്ങള്‍ തന്നെ കാണുന്നു എങ്കില്‍ ഏറ്റവും അടുത്തു തന്നെ ആപത്തുകള്‍ വന്നുകൂടുമെന്നു പറയണം. അപ്രകാരം ഗുണങ്ങള്‍ മാത്രമായി കണ്ടാല്‍ ഉടന്‍ തന്നെ സമ്പത്ത് അനുഭവിക്കുന്നതിനിടവരുമെന്നും, ഏതാനും ഗുണങ്ങളും ഏതാനും ദോഷങ്ങളും ഇടകലര്‍ന്നു കണ്ടാല്‍ ഗുണദോഷങ്ങളില്‍ ഏതാണോ അധികമായിരിക്കുന്നത് അതിന്‍റെ അനുഭവത്തെയും പറയണം.
കലിയുഗകാലത്ത് ജനങ്ങള്‍ മിക്കവാറും ഭാഗ്യഹീനന്മാരായതുകൊണ്ട് ഗുണദോഷങ്ങളെക്കൊണ്ട് പ്രശ്നം മിശ്രരൂപമായികണ്ടാല്‍ കൂടുതല്‍ കുറവിനെ ആലോചിക്കേണ്ട. ദോഷത്തെത്തന്നെ പറയാം എന്നും പക്ഷമുണ്ട്.
