വിവാഹപ്രശ്നത്തിലും യുക്തിപോലെ യോജിപ്പിച്ചു വിചാരിക്കേണ്ടതാണ്

ചിന്ത്യാനി പൂർവ്വം കഥിതാനി സർവ്വാ-

ണ്യത്രാപി സമ്യക്സമയാദികാനി

തേഷാം ശുഭത്വേ പതിപുത്രസമ്പ

ദ്വിവാഹലാഭശ്ച ന ചാശുഭത്വേ.

സാരം :-

"ദൈവജ്ഞേന സമാഹിതേന സമയോ " ഇത്യാദി ഭാഗങ്ങളെക്കൊണ്ടു പ്രശ്നസമയസംഭൂതങ്ങളായ ലക്ഷണങ്ങൾ വിവാഹപ്രശ്നത്തിലും യുക്തിപോലെ യോജിപ്പിച്ചു വിചാരിക്കേണ്ടതാണ്. പ്രശ്നസമയം, ദേശം, വായു, അവസ്ഥ, തല്ക്കാലസംഭൂതങ്ങളായ മറ്റു നിമിത്തങ്ങൾ ഇവയെല്ലാം ശോഭനങ്ങളായിരുന്നാൽ ഉടൻതന്നെ വിവാഹയോഗമുണ്ടെന്നും സന്താനം, സമ്പത്ത് മുതലായ സൌഭാഗ്യയോഗങ്ങൾ ഭാവിയിൽ സുലഭങ്ങളായിരിക്കുമെന്നും പറയണം. അതുപോലെ പ്രശ്നസമയം, ദേശം, വായു മുതലായവയും മറ്റു താല്ക്കാലിക ലക്ഷണങ്ങളും വിപരീതമായി കണ്ടാൽ വിവാഹം എളുപ്പമല്ലെന്നും അഥവാ വിവാഹംകഴിഞ്ഞാൽ തന്നെയും ഭാവിയിലുള്ള അനുഭവങ്ങൾ ദുഃഖപ്രദമായിരിക്കുമെന്നും പറയണം.

നിമിത്തചിന്തയിൽ ശുഭാശുഭത്വം പ്രശ്നവിഷയത്തെ ആശ്രയിച്ചിരിക്കും. ആയുഃപ്രശ്നത്തിൽ ഇരട്ടയായ കോടിവസ്ത്രം കൊണ്ടുവരുന്നതും മരണ ലക്ഷണമായും വിവാഹപ്രശ്നസമയത്ത് ഇങ്ങനെ ഇരട്ടക്കോടിവസ്ത്രം കൊണ്ടുവന്നാൽ വിവാഹത്തിന്റെ ക്ഷണസാദ്ധ്യലക്ഷണമായും ധരിക്കണം. ഇതുപോലെ ലക്ഷണങ്ങളുടെ അന്തരങ്ങളെ യുക്തികൊണ്ടു ചിന്തിച്ചുകൊള്ളേണ്ടതാണ്.