പാപേ സപ്തമഗേ കളത്രമരണം രോഗോ വിയോഗോƒസ്യവാ
ഭര്‍ത്തുര്‍വാ ഗമനാന്തരായ ഉദിയാല്‍ സ്യൂര്‍മ്മൂത്രകൃഛ്രാദയഃ
സൗമ്യേ സപ്തമഗേ വിവാഹഘടനാ നഷ്ടാര്‍ത്ഥലാഭഃ സ്വദൃ
ഗ്ഭോഗാവാപ്തി വിദേശയാതസുഹൃദായാനാദികം സ്യാല്‍ ഫലം
മദനേ പാപസമേതേ ദാഹാദികമപി ഗ്രഹസ്യ ഭാര്യായാഃ
ബലവല്‍ശുഭസംയുക്തേ ഗൃഹകരണം സംഭവേച്ച ജായായാഃ
ഏഴാം ഭാവത്തില്‍ പാപഗ്രഹങ്ങള്‍ നിന്നാല്‍ അവരുടെ മൗഢ്യം മുതലായ ദോഷസ്ഥിതി അനുസരിച്ച് ഭാര്യയ്ക്ക് രോഗമോ വിയോഗമോ മരണമോ ഉണ്ടാകുമെന്ന് പറയണം. സ്ത്രീയെക്കുറിച്ചുള്ള പ്രശ്നമായാല്‍ ഇതുപോലെതന്നെ ഭര്‍ത്താവിനു രോഗമോ വിരഹമോ മരണമോ ഉണ്ടാകുമെന്ന് പറയണം. പിന്നീട് പോകേണ്ട കാര്യങ്ങള്‍ക്ക് പോകാന്‍ സാധിക്കാതെ വരികയും മൂത്രകൃഛ്രം മുതലായ വസ്തിരോഗങ്ങളുണ്ടാകുകയും ചെയ്യും. ഭാര്യാഗൃഹത്തിന് അഗ്നിബാധ മുതലായ ദോഷങ്ങള്‍ സംഭവിക്കുകയും സ്ത്രീയെക്കുറിച്ചുള്ള പ്രശ്നമാണെങ്കില്‍ ഭര്‍ത്താവിന്‍റെ ഗൃഹത്തിന് അഗ്നിബാധ മുതലായ ആപത്തുകളുണ്ടെന്നും പറയണം.
എഴില്‍ ശുഭഗ്രഹങ്ങള്‍ നിന്നാല്‍ വിവാഹലാഭവും, വിദേശയാത്രയും, നഷ്ടപ്പെട്ടുപോയ ദ്രവ്യത്തിന്‍റെ പിന്നീടുള്ള ലാഭവും സൗന്ദര്യവതികളായ സ്ത്രീകളില്‍ നിന്ന് സുരതസുഖവും ദൂരദേശങ്ങളില്‍ പോയിരുന്ന ബന്ധുക്കളുടെ സംഗമവും ഭാര്യയ്ക്ക് വീടുപണി ചെയ്യിക്കുന്നതിനും ഇടയാവുമെന്നും പറയണം.
