വിവാഹിതയായാല്‍ സിന്ദൂരം ധരിക്കണമെന്നത് ഒരു അലിഖിത നിയമമായി ആധുനിക സ്ത്രീകളും കണക്കാക്കിപ്പോരുന്നുണ്ട്.
സീമന്തരേഖയില്‍ കുങ്കുമം ചാര്‍ത്തുന്നതിനെ പഴമക്കാര്‍ ഗൌരവമേറിയ ഒന്നായാണ് കണ്ടിരുന്നത്. വിവാഹശേഷം ആദ്യഗര്‍ഭം ഉണ്ടായി നാലാം മാസം സീമന്തനം അഥവാ കുങ്കുമം ചാര്‍ത്ത് എന്ന ചടങ്ങ് തന്നെ നേരത്തെ ഉണ്ടായിരുന്നു. വിവാഹിതരായിക്കഴിഞ്ഞാല്‍ ഭൂരിപക്ഷം സ്ത്രീകളും തലമുടി പകുത്ത് അതിന് നടുവിലൂടെയുള്ള സീമന്തരേഖയില്‍ കുങ്കുമം അണിയണമെന്ന് ഒരു വിധി തന്നെ ഉത്തരേന്ത്യയില്‍ നിലനില്‍ക്കുന്നുണ്ട്. ചില സ്ഥലങ്ങളില്‍ ഗര്‍ഭവതിയായ ശേഷം ഈ ചടങ്ങ് ആഘോഷിക്കാറുമുണ്ട്.
താന്‍ ഭര്‍തൃമതിയാണെന്നും മറ്റുള്ളവര്‍ക്ക് തന്നോട് ആസക്തി വേണ്ടെന്നുമാണ് ഇത് തെളിയിക്കുന്നതെന്ന് കളിയാക്കുന്നവരുമുണ്ട്. എന്നാല്‍ തന്ത്രശാസ്ത്രപ്രകാരം ഇതിന് മറ്റൊരര്‍ത്ഥമുണ്ടെന്ന് ആചാര്യന്മാര്‍ വിധിയെഴുതിയിട്ടുണ്ട്. ശിരസ്സിലെ മുടി പകുത്ത് വയ്ക്കുന്നത് സ്ത്രീയുടെ ജനനേന്ദ്രിയത്തിന് തുല്യമാണെന്ന് തന്ത്രശാസ്ത്രം പറയുന്നു. അവിടെ ചുവന്ന കുങ്കുമം അണിയുന്നതാകട്ടെ തന്‍റെ കന്യകാത്വം ഒരു പുരുഷനാല്‍ ഭേദിക്കപ്പെട്ടു എന്ന് കാണിക്കാനുമാണ്.
