ജ്യോതിഷം വേദത്തിന്‍റെ കണ്ണുകള്‍

വേദസ്യ ചക്ഷുഃ കില ശാസ്ത്രമേതല്‍

പ്രധാനതാംഗേഷു തതോƒസ്യ യുക്താ

അംഗൈ൪യ്യുതോƒന്യൈരപി പൂ൪ണ്ണമൂ൪ത്തി-

ശ്ചക്ഷു൪വിനാ കഃ പുരുഷത്വമേതി.

സാരം :-

ജ്യോതിശ്ശാസ്ത്രം വേദത്തിന്‍റെ കണ്ണുകളാണ്. അതുകൊണ്ട് മറ്റുള്ള ശാസ്ത്രങ്ങളെക്കാള്‍ ജ്യോതിഷത്തിനു പ്രാമാണ്യമുണ്ടെന്നു തെളിയുന്നു. മറ്റുള്ള എല്ലാ അംഗങ്ങളെക്കൊണ്ടും സംപൂ൪ണ്ണനായിരുന്നാലും കണ്ണില്ലാതെ പോയാല്‍ അവന്‍ യഥാ൪ത്ഥപുരുഷനായി തീരുന്നില്ല. അതുപോലെ മറ്റു ശാസ്ത്രങ്ങള്‍ പ്രബലങ്ങളായാലും ജ്യോതിഷമില്ലാതെ വേദത്തിനു സംപൂ൪ണ്ണത സിദ്ധിക്കുന്നതല്ല. അതുകൊണ്ടാണ് ജ്യോതിഷം വേദാംഗം എന്ന് പറയുന്നത്. 

കുടുംബിനികള്‍ എന്തിന് സിന്ദൂരം ധരിക്കണം?

  വിവാഹിതയായാല്‍ സിന്ദൂരം ധരിക്കണമെന്നത് ഒരു അലിഖിത നിയമമായി ആധുനിക സ്ത്രീകളും കണക്കാക്കിപ്പോരുന്നുണ്ട്.

  സീമന്തരേഖയില്‍ കുങ്കുമം ചാര്‍ത്തുന്നതിനെ പഴമക്കാര്‍ ഗൌരവമേറിയ ഒന്നായാണ് കണ്ടിരുന്നത്. വിവാഹശേഷം ആദ്യഗര്‍ഭം ഉണ്ടായി നാലാം മാസം സീമന്തനം അഥവാ കുങ്കുമം ചാര്‍ത്ത് എന്ന ചടങ്ങ് തന്നെ നേരത്തെ ഉണ്ടായിരുന്നു. വിവാഹിതരായിക്കഴിഞ്ഞാല്‍ ഭൂരിപക്ഷം സ്ത്രീകളും തലമുടി പകുത്ത് അതിന് നടുവിലൂടെയുള്ള സീമന്തരേഖയില്‍ കുങ്കുമം അണിയണമെന്ന് ഒരു വിധി തന്നെ ഉത്തരേന്ത്യയില്‍ നിലനില്‍ക്കുന്നുണ്ട്. ചില സ്ഥലങ്ങളില്‍ ഗര്‍ഭവതിയായ ശേഷം ഈ ചടങ്ങ് ആഘോഷിക്കാറുമുണ്ട്.

  താന്‍ ഭര്‍തൃമതിയാണെന്നും മറ്റുള്ളവര്‍ക്ക് തന്നോട് ആസക്തി വേണ്ടെന്നുമാണ് ഇത് തെളിയിക്കുന്നതെന്ന് കളിയാക്കുന്നവരുമുണ്ട്. എന്നാല്‍ തന്ത്രശാസ്ത്രപ്രകാരം ഇതിന് മറ്റൊരര്‍ത്ഥമുണ്ടെന്ന് ആചാര്യന്മാര്‍ വിധിയെഴുതിയിട്ടുണ്ട്. ശിരസ്സിലെ മുടി പകുത്ത് വയ്ക്കുന്നത് സ്ത്രീയുടെ ജനനേന്ദ്രിയത്തിന് തുല്യമാണെന്ന് തന്ത്രശാസ്ത്രം പറയുന്നു. അവിടെ ചുവന്ന കുങ്കുമം അണിയുന്നതാകട്ടെ തന്‍റെ കന്യകാത്വം ഒരു പുരുഷനാല്‍ ഭേദിക്കപ്പെട്ടു എന്ന് കാണിക്കാനുമാണ്.