അധിയോഗത്തിന്റെ യോഗലക്ഷണത്തെ പറയുന്നു

സൌമ്യൈഃ സ്മരാരിനിധനേഷ്വധിയോഗ ഇന്ദോ-

സ്തസ്മിംശ്ചമൂപസചിവക്ഷിതിപാലജന്മ

സംപന്നസൌഖ്യവിഭവാ ഹതശത്രവശ്ച

ദീർഗ്ഘായുഷോ വിഗതരോഗഭയാശ്ച ജാതാഃ

സാരം :-

ജനനസമയത്ത് ചന്ദ്രൻ നിൽക്കുന്ന രാശിയുടെ 6 - 7 - 8 എന്നീ ഭാവങ്ങളിലൊന്നിലോ രണ്ടിലോ മൂന്നിലും കൂടിയോ ബുധഗുരുശുക്രന്മാർ മൂന്നും നിന്നാൽ അതു അധിയോഗത്തിന്റെ ലക്ഷണമാകുന്നു.

ഈ യോഗകർത്താക്കന്മാരായ ബുധഗുരുശുക്രന്മാർ മൂന്നും ബലഹീനന്മാരാണെങ്കിൽ ഈ യോഗജാതൻ സേനാപതിയും, ഇവർ മധ്യബലവാന്മാരാണെങ്കിൽ രാജമന്ത്രിയും, പൂർണ്ണബലവാന്മാരാണെങ്കിൽ രാജാവുമാവുന്നതാണ്. അധിയോഗജാതന്മാരായ ഈ സേനാപതി തുടങ്ങിയ മൂന്നു തരക്കാരും ധനധാന്യാദികളും സുഖവും വസനാസന ശയനീയാദ്യുപയോഗ്യവിഭവങ്ങളുമുള്ളവരും ശത്രുക്കളെ ജയിയ്ക്കുന്നവരും രോഗപീഡയും ഭയവുമില്ലാത്തവരുമായി ദീർഘായുസ്സ് അനുഭവിയ്ക്കുന്നതുമാണ്. ഈ അധിയോഗസ്ഥാനത്തു (ചന്ദ്രന്റെ 6 - 7 - 8 ഭാവങ്ങളിൽ) പാപഗ്രഹങ്ങൾ നിന്നാൽ ദോഷഫലങ്ങൾ അനുഭവിയ്ക്കുന്നതാണെന്നും അറിയണം.

അധിയോഗത്തിന്റെ ലക്ഷണത്തിനും ഫലത്തിനും കുറെയൊക്കെ വ്യത്യാസം കല്പിച്ചും മറ്റു ചിലർ വ്യാഖ്യാനിച്ചു കാണ്മാനുണ്ട്. എങ്ങനെയെന്നാൽ, ചന്ദ്രാധിഷ്ഠിതരാശിയുടെ ഏഴാം ഭാവത്തിൽ ഒരു ശുഭഗ്രഹം നിന്നാൽ സേനാനായകനും, രണ്ടു ശുഭഗ്രഹങ്ങൾ നിന്നാൽ രാജമന്ത്രിയും മൂന്നു ശുഭഗ്രഹങ്ങൾ നിന്നാൽ രാജാവുമാവും, ചന്ദ്രന്റെ ആറാം ഭാവത്തിൽ ഒരു ശുഭഗ്രഹം നിന്നാൽ ധനികനും തന്നിമിത്തം സുഖിയും, രണ്ടു ശുഭഗ്രഹങ്ങൾ നിന്നാൽ വസനാശനാദി വിഭവങ്ങൾ ഉള്ളവനും, മൂന്നു ശുഭഗ്രഹങ്ങൾ നിന്നാൽ ശത്രുക്കളെ തോൽപ്പിച്ചവനുമാവും. ചന്ദ്രന്റെ എട്ടാം ഭാവത്തിൽ ഒരു ശുഭഗ്രഹം നിന്നാൽ ദീർഘായുഷ്മാനും രോഗവിഹീനനും, മൂന്നു ശുഭഗ്രഹങ്ങൾ നിന്നാൽ ഭയമില്ലാത്തവൻ കൂടിയുമായിരിയ്ക്കും. ഈ അഭിപ്രായവും സ്വീകാര്യമാണെന്നും അറിയണം.