ദേവകോപത്തെ പറയേണ്ടതാണ്

സൗമ്യാനാമുദയശ്ച ദൃഷ്ടിരമരാചാ൪യ്യസ്ഥിതിശ്ചേപ്സിതേ

ഭാവേ ചാഭിമതേ തഥേതരഖഗാ ദേവസ്യ തേƒനുഗ്രഹം

ബ്രൂയുഃ പാപദൃഗന്വയാനഭിമതസ്ഥാനസ്ഥസ൪വ്വഗ്രഹാ-

കോപം സാശുഭഭാവഹേതുകമിമം തം വാഥ ഭാവം പ്രതി.

സാരം :-

ദേവപ്രശ്നത്തില്‍ ശുഭഗ്രഹങ്ങളോ, വിശേഷിച്ച് വ്യാഴമോ, ലഗ്നത്തില്‍, നില്‍ക്കുക, നോക്കുക ഇഷ്ടഭാവങ്ങളില്‍ വരിക, പാപഗ്രഹങ്ങള്‍ക്ക് വിധിച്ചിട്ടുള്ള ഭാവങ്ങളില്‍ പാപഗ്രഹങ്ങള്‍ നില്‍ക്കുക ഈ വക ലക്ഷണങ്ങളുണ്ടെങ്കില്‍ ദേവന്‍റെ അനുഗ്രഹം ശരിയായുണ്ടെന്നു പറയണം. ശുഭഗ്രഹങ്ങളില്‍വച്ച് വ്യാഴത്തിനു പ്രാമാണ്യമുണ്ടെന്നു പ്രത്യേകം ഓ൪ത്തുകൊള്ളണം.

ദേവപ്രശ്നത്തില്‍ ലഗ്നത്തിലേയ്ക്ക്‌ പാപഗ്രഹങ്ങളുടെ യോഗദൃഷ്ടികളുണ്ടാവുക, ശുഭഗ്രഹങ്ങളും പാപഗ്രഹങ്ങളും അവരവ൪ക്ക് ഇഷ്ടമല്ലാത്ത ഭാവങ്ങളില്‍ നില്‍ക്കുക, ഈ വക ലക്ഷണങ്ങളുണ്ടെങ്കില്‍ ദേവകോപത്തെ പറയേണ്ടതാണ്.

ദേവപ്രശ്നത്തില്‍ ഏതൊരു ഭാവത്തിലാണോ ദേവകോപത്തിന് ഹേതുഭൂതന്മാരായ ഗ്രഹങ്ങള്‍ നില്‍ക്കുന്നത്, ആ ഭാവം നിമിത്തമാണ് ദേവകോപം ഉണ്ടായതെന്ന് മുന്‍പറഞ്ഞ ക്രമം അനുസരിച്ച് ചിന്തിക്കേണ്ടതാണ്. അഥവാ ആ ഭാവംകൊണ്ട് തന്ത്രി, ഊരാളന്‍ മുതലായവരില്‍ ആരെ ചിന്തിക്കാമൊ അവരുടെ മേല്‍ ദേവകോപം ഉണ്ടെന്നും പറയാം. ഇതുപോലെ ലഗ്നഭാവംകൊണ്ട് സാന്നിദ്ധ്യം, സാന്നിദ്ധ്യവൈകല്യം ഇവയും ന്യായമനുസരിച്ചു ചിന്തിച്ചുകൊള്ളണം. സാന്നിദ്ധ്യവൈകല്യത്തിനുള്ള കാരണങ്ങളും തന്മൂലമുണ്ടാകുന്ന ഫലങ്ങളും അനിഷ്ടഭാവങ്ങളില്‍ നില്‍ക്കുന്ന ഗ്രഹങ്ങളെക്കൊണ്ടാണ് ചിന്തിക്കേണ്ടത്.