ദ്യൂതർണ്ണപാനരതനാസ്തികചോരനിസ്സ്വഃ
കുസ്ത്രീകകൂടകൃദസത്യരതഃ കുജർക്ഷേ
ആചാര്യഭൂരിസുതദാരധനാർജനേഷ്ടഃ
ശൌക്രേ വദാന്യഗുരുഭക്തിരതശ്ച സൗമ്യേ.
സാരം :-
മേടം രാശിയിലോ വൃശ്ചികം രാശിയിലോ ബുധൻ നിൽക്കുമ്പോൾ ജനിക്കുന്നവൻ ചൂതുകളിയിലും, കടം വാങ്ങുന്നതിലും മദ്യപാനത്തിലും താല്പര്യം ഉള്ളവനായും വേദശാസ്ത്രങ്ങളെ ദ്വേഷിക്കുന്നവനായും ചൌര്യത്തെ പ്രവർത്തിക്കുന്നവനായും ധനഹീനനായും കുത്സിതയായ ഭാര്യയോടുകൂടിയവനായും കപടവിദ്യയിലോ ജാലവിദ്യയിലോ നൈപുണ്യമുള്ളവനായും അസത്യവാനായും ഭവിക്കും.
ഇടവം രാശിയിലോ തുലാം രാശിയിലോ ബുധൻ നിൽക്കുമ്പോൾ ജനിക്കുന്നവൻ വിദ്യകളെ അദ്ധ്യയനം ചെയ്യുന്നവനായും വളരെ പുത്രന്മാരും ഭാര്യയും ഉള്ളവനായും ധനസമ്പാദനത്തിൽ പ്രിയമുള്ളവനായും ഔദാര്യവും ഗുരുഭക്തിയും ഉള്ളവനായും ഭവിക്കും.
