കരഭഗളസ്സിരാലുഖരലോമശദീർഘതനുഃ
പൃഥുചരണോരുപൃഷ്ഠജഘനാസ്യകടിർബധിരഃ
പരവനിതാർത്ഥപാപനിരതഃ ക്ഷയവൃദ്ധിയുതഃ
പ്രിയകുസുമാനുലേപനസുഹൃൽ ഘടജോƒധ്വസഹഃ
സാരം :-
കുംഭം രാശിയിൽ ചന്ദ്രൻ നിൽക്കുമ്പോൾ ജനിക്കുന്നവൻ (കുംഭക്കൂറിൽ ജനിക്കുന്നവൻ) ഒട്ടകത്തെപ്പോലെ നീണ്ടിരിക്കുന്ന കഴുത്തും പൊന്തിയിരിക്കുന്ന ചെറുഞരമ്പുകളും പരുഷങ്ങളായ രോമങ്ങളും നീണ്ട ശരീരവും തടിച്ചിരിക്കുന്ന കാൽകളും തുടയും പൃഷ്ഠവും നിതംബസ്ഥാനവും മുഖവും അരക്കെട്ടും ഉള്ളവനായും ചെവികേൾക്കാത്തവനായും പരസ്ത്രീയേയും പരദ്രവ്യത്തേയും ആഗ്രഹിക്കുന്നവനായും പാപകർമ്മങ്ങളിൽ തല്പരനായും വർദ്ധനയും ക്ഷയവും ഇടയ്ക്കിടെ ഉണ്ടായിരിക്കുന്നവനായും പുഷ്പങ്ങളിലും സുഗന്ധദ്രവ്യങ്ങളിലും ബന്ധുക്കളിലും താല്പര്യമുള്ളവനായും സഞ്ചാരക്ളേശത്തെ സഹിക്കുന്നവനായും ഭവിക്കും.
