പാപാവുദയാസ്തഗതൗ ക്രൂരേണ യുതശ്ച ശശീ
ദൃഷ്ടശ്ച ശുഭൈർന്ന യദാ മൃത്യുശ്ച ഭവേദചിരാത്.
സാരം :-
ജനനസമയത്തു ലഗ്നത്തിലും ലഗ്നാൽ ഏഴാം ഭാവത്തിലും ഓരോ പാപഗ്രഹങ്ങൾ നിൽക്കുക; ഏതു ഭാവത്തിലായാലും ശരി ചന്ദ്രൻ ഒരു പാപഗ്രഹത്തിനോടുകൂടി നിൽക്കുകയും ആ ചന്ദ്രന് ശുഭഗ്രഹങ്ങളുടെ യോഗദൃഷ്ടികൾ ഇല്ലാതിരിയ്ക്കുകയും ചെയ്ക; ഇങ്ങനെ വന്നാൽ ജാതനായ ശിശുവിന് ഒരു കൊല്ലം മാത്രമേ ആയുസ്സ് ഉണ്ടാകയുള്ളു.
ഇവിടെ ചന്ദ്രന് ശുഭാഗ്രഹങ്ങളുടെ ദൃഷ്ടി ഉണ്ടാകാതിരിയ്ക്കണമെന്നേ മൂലംകൊണ്ട് പറഞ്ഞിട്ടുള്ളൂവെങ്കിലും " യോഗേ ദൃഷ്ടിഫലം വാച്യം ദൃഷ്ടൌ യോഗഫലം തഥാ " എന്ന് പ്രമാണം കാണുന്നതിനാൽ, ഏതു സ്ഥലത്തും യോഗമെന്നോ ദൃഷ്ടിയെന്നോ ഒന്നു പറഞ്ഞാൽ രണ്ടിനേയും സ്വീകരിയ്ക്കേണ്ടതാണെന്നു സിദ്ധിയ്ക്കുന്നു. അതിനാലാണ് ഇവിടെ ചന്ദ്രന്നു ശുഭഗ്രഹയോഗം ഉണ്ടാവരുത് എന്നു പറഞ്ഞത്.