ചന്ദ്രൻ കന്നി രാശിയിൽ നിന്നാലത്തെ ഫലം പറയുന്നു

വ്രീളാമന്ഥരചാരുവീക്ഷണഗതിഃ

സ്രസ്താംസബാഹുസ്സുഖീ

ശ്ലക്ഷ്ണസ്സത്യരതഃ കലാസു നിപുണ-

ശ്ശാസ്ത്രാർത്ഥവിദ്ധാർമ്മികഃ

മേധാവീ സുരതപ്രിയഃ പരഗൃഹൈർ-

വ്വിത്തൈശ്ച സംയുജ്ജ്യതേ

കന്യായാം പരദേശഗഃ പ്രിയവചാഃ

കന്യാപ്രജോƒല്പാത്മജഃ

സാരം :-

ജനനസമയത്തു കന്നി രാശിയിൽ ചന്ദ്രൻ നിന്നാൽ; അസാമാന്യമായ ലജ്ജയുള്ളവനും അതുനിമിത്തം മന്ദമായും ഭംഗിയായും ഗമിയ്ക്കുകയും അപ്രകാരം വീക്ഷിയ്ക്കുകയും ചെയ്യുന്നവനും, സൌന്ദര്യലക്ഷണമാകത്തക്കനിലയിൽ കുറഞ്ഞൊന്നു താണ ചുമലുകളോടുകൂടിയവനായും, വേണ്ടുംവണ്ണം സുഖം അനുഭവിയ്ക്കുന്നവനും, ശരീരത്തിനു മാർദ്ദവമുള്ളവനും, സത്യപ്രിയനും കൊട്ട് പാട്ട് ചിത്രമെഴുത്ത് മുതലായ കലാവാദ്യങ്ങളിൽ നിപുണനും, സകല ശാസ്ത്രങ്ങളുടേയും അർത്ഥം അറിയുന്നവനും, ധർമ്മിഷ്ഠനും, ബുദ്ധിയ്ക്കു നല്ല ധാരണാശക്തിയുള്ളവനും, സുരതത്തിങ്കൽ അതിതല്പരനും, അന്യന്റെ ഗൃഹവും ധനവും തന്റേതായി സിദ്ധിയ്ക്കുന്നവനും, ജനിച്ചുവളർന്ന ദിക്കുവിട്ടു അന്യദിക്കിൽ താമസിയ്ക്കേണ്ടിവരുന്നവനും, സന്തോഷം ജനിയ്ക്കത്തക്ക മനോഹരവാക്കുകൾ സംസാരിയ്ക്കുന്നവനും, സ്ത്രീ സന്താനം വർദ്ധിച്ചും പുരുഷസന്താനം നന്നേ കുറഞ്ഞുമിരിയ്ക്കുന്നവനുമാകുന്നതാണ്.