ചന്ദ്രൻ ധനു രാശിയിൽ നിന്നാലത്തെ ഫലം പറയുന്നു

വ്യാദീർഘാസ്യശിരോധരഃ പിതൃധന-

സ്ത്യാഗീ കവിർവീര്യവാൻ

വക്താ സ്ഥൂലരദശ്രവോധരനസഃ

കർമ്മോദ്യതശ്ശില്പവിൽ

കുബ്ജാംസഃ കുനഖീ സുമാംസളഭുജഃ

പ്രാഗത്ഭ്യവാൻ ധർമ്മവിദ്

ബന്ധുദ്വിണ്ണ ബലാൽ സമേതി ച വശം

സാമൈകസാദ്ധ്യേƒശ്വജഃ

സാരം :-

മുഖത്തിനും കഴുത്തിനും അസാധാരണമായ നീളമുണ്ടായിരിക്കുക, പിതൃധനം ലഭിക്കുക, ദാനശീലനാവുക, കാവ്യനാടകാലങ്കാരാദി ഗ്രന്ഥങ്ങളെ നിർമ്മിയ്ക്കുക, പരാക്രമശാലിയാവുക, അസാധാരണമായ വാക്സാമർത്ഥ്യമുണ്ടാവുക, പല്ലുകൾ, ചെവികൾ, ചുണ്ടുകൾ, മൂക്ക് ഇതുകൾക്ക് അസാമാന്യമായ വലുപ്പമുണ്ടാവുകയും, സകല പ്രവൃത്തികളിലും ഉത്സാഹശീലനാവുകയും ചെയ്ക, കൊത്തുപണി, ചിത്രമെഴുത്ത്, മരപ്പണി മുതലായ ശില്പവിദ്യകളിൽ സാമർത്ഥ്യമുണ്ടാവുക, എല്ലുകളും മറ്റും മുഴച്ചുകാണാത്ത അസ്പഷ്ടങ്ങളായ ചുമലുകളോടുകൂടി ഇരിയ്ക്കുക, കരപാദാദികളിൽ കുഴിനഖമെന്ന രോഗമുണ്ടാവുക, കൈകൾ തടിച്ചിരിക്കുക, അസാധാരണമായ പ്രതിഭാശക്തിയുണ്ടാവുക, ധർമ്മാധർമ്മജ്ഞനും അതനുസരിച്ചു പ്രവർത്തിക്കുന്നവനുമാവുക, സ്വകുടുംബങ്ങളെ ദ്വേഷിക്കുക, ബലപ്രയോഗംകൊണ്ടോ ഉപദ്രവിച്ചിട്ടോ സ്വാധീനമാക്കാൻ കഴിയാത്തതും, നല്ല വാക്കുകൊണ്ടുമാത്രം സ്വാധീനമാക്കാൻ കഴിയുന്നതുമായ സ്വഭാവക്കാരനാവുക - ഇതെല്ലാം ചന്ദ്രൻ ധനു രാശിയിൽ നിന്നാലത്തെ ഫലങ്ങളാകുന്നു.