മേടം രാശിയിൽ നിൽക്കുന്ന ചൊവ്വായുടെ ദശാകാലം

ക്രിയഗതഭൗമദശായാം

പ്രവർത്തതേ ഖ്യാതിമാൻ മഹോത്സാഹീ

പിത്താഗ്നിചോരബാധ-

ബഹ്വായാസേന സപ്തഃ

മൂലത്രികോണ സ്ഥിതഭൗമദായേ

മൃഷ്ടാന്നപാനംബരഭൂഷണാർത്ഥാൻ

പുരാണധർമ്മശ്രുതിപുത്രദാര-

പ്രാപ്തിം കൃഷിം ഭ്രാതൃസുഖം സമേതി.

സാരം :-

മേടം രാശിയിൽ നിൽക്കുന്ന ചൊവ്വായുടെ ദശാകാലം പ്രസിദ്ധിയും വലുതായ ഉത്സാഹവും ഉണ്ടായിരിക്കുകയും പിത്തം, അഗ്നി, കള്ളന്മാർ, ഇത്യാദികളിൽ നിന്ന് ഉപദ്രവവും വലിയ ശ്രമങ്ങളെക്കൊണ്ടുള്ള ക്ലേശവും അനുഭവിക്കുന്നതാണ്.

മേടം രാശിയിൽ ആദ്യത്തെ പന്ത്രണ്ട് തിയതിക്കകമുള്ള മൂലത്രികോണങ്ങളിൽ നിൽക്കുന്ന ചൊവ്വായുടെ ദശാകാലം സുഖമായ ഭക്ഷണവും വിദേശവസ്ത്രങ്ങളും ആഭരണങ്ങളും ധനവും ലഭിക്കുകയും പുരാണശ്രവണത്തിലും ധർമ്മകാര്യങ്ങൾ കേൾക്കുന്നതിലും താൽപര്യവും പുത്രലാഭവും ഭാര്യാലബ്ധിയും (ഭാര്യാസുഖവും) കൃഷിഗുണവും സഹോദരസുഖവും ഭൂമിലാഭം, വാഹനലാഭം, ഗൃഹാധിപത്യം, കീർത്തി മുതലായ മറ്റുഗുണഫലങ്ങളും സിദ്ധിക്കുകയും ചെയ്യും.

ഒരു ഗ്രഹത്തിനു രണ്ടു ഭാവങ്ങളുടെ ആധിപത്യം ഉണ്ടായാൽ

ദ്വിസ്ഥാനാധിപതിത്വമസ്തി യദി ചേ-

ന്മുഖ്യം ത്രികോണർക്ഷജം

തസ്യാർദ്ധം സ്വഗൃഹേƒഥ പൂർവ്വമുഭയോ-

ര്യത്തദ്ദശാദൌ വദേൽ

പശ്ചാദ്‌ ഭാവമിഹാപരാർദ്ധസമയേ

യുഗ്മേ ഗൃഹേ യുഗ്മജം

ത്വോജസ്ഥേ സതി ചൌജഭാവജഫലം

ശംസന്തി കേചിജ്ജനാഃ

സാരം :-

ഒരു ഗ്രഹത്തിനു രണ്ടു ഭാവങ്ങളുടെ ആധിപത്യം ഉണ്ടായാൽ അതിൽ മൂലത്രികോണമായ ഭാവത്തിന്റെ ഫലം മുമ്പെ പ്രധാനമായും അനുഭവിക്കും. സ്വക്ഷേത്രമായ ഭാവത്തിന്റെ ഫലം രണ്ടാമത് അപ്രധാനമായും അനുഭവിക്കുന്നതാണ്. ഈ ഫലം എല്ലാ ദശകളിലും കല്പിച്ചുകൊൾകയും വേണം. ഇവിടെ ഈ ഗ്രഹം ഓജരാശിയിലിരിക്കുകയാണെങ്കിൽ ഭാവഫലങ്ങളിൽ ഓജരാശിയുടെ ഫലം ആദ്യവും യുഗ്മരാശിസ്ഥനാണെങ്കിൽ യുഗ്മരാശിയായ ഭാവത്തിന്റെ ഫലം ആദ്യമായും അനുഭവിക്കുന്നതാണെന്നു ചില ജ്യോതിഷ ആചാര്യന്മാർ പറയുന്നു. രണ്ടും പ്രധാനമാണെങ്കിലും ആദ്യപക്ഷംതന്നെ ഇവിടെ സ്വീകാര്യമായിക്കാണുന്നു എന്ന് അറിഞ്ഞുകൊൾകയും വേണം.