അഷ്ടകവർഗ്ഗഫലങ്ങൾ പറയുമ്പോൾ ശ്രദ്ധിക്കണം

ഇതി നിഗദിതമിഷ്ടംനേഷ്ടമന്യദ്വിശേഷാ-

ദധികഫലവിപാകം ജന്മഭാത്തത്ര ദദ്യുഃ

ഉപചയഗൃഹമിത്രസോച്ചഗൈഃ പുഷ്ടമിഷ്ട-

ന്ത്വപചയഗൃഹനീചാരാതിഗൈർന്നേഷ്ടസംപൽ.

സാരം :-

ദ്വാദർക്ക ഇത്യാദി ശ്ലോകംകൊണ്ടു പറയപ്പെട്ട സ്ഥാനങ്ങൾ ഇഷ്ടങ്ങളാകുന്നു. അതാതു ശ്ലോകത്തിങ്കൽ പറയപ്പെടാത്തവ അനിഷ്ട സ്ഥാനങ്ങളാകുന്നു. ഇഷ്ടാനിഷ്ടഫലങ്ങളിൽ വെച്ച് സംശോധനം ഹേതുവായിട്ട് അധികമായിവരുന്ന ഫലം യാതൊന്നോ അതിന്റെ അനുഭവത്തെ ഗ്രഹങ്ങൾ ജനനകാലത്തിങ്കൽ യാതൊരുരാശിയിലോ അതിങ്കൽനിന്ന് മേൽപ്പറഞ്ഞ സ്ഥാനങ്ങളിൽ നിൽക്കുമ്പോൾ ജനിപ്പിക്കുന്നു. ഉപചയസ്ഥാനങ്ങളിലും ബന്ധുക്ഷേത്രത്തിങ്കലും ഉച്ചത്തിങ്കലും നിൽക്കുന്ന ഗ്രഹങ്ങൾ ഇഷ്ടഫലത്തെ പുഷ്ടിയോടു കൂടിയതാക്കി ചെയ്യും. അപചയരാശികളിലും നീചത്തിലും ശത്രുക്ഷേത്രത്തിലും നിൽക്കുന്ന ഗ്രഹങ്ങൾ അനിഷ്ടഫലത്തെ പുഷ്ടമാക്കി ചെയ്യും.

"വിശേഷാദധികഫലവിപാകം ജന്മിനാം തത്ര ദദ്യുഃ" എന്നും പാഠമുണ്ട്. ഈ അംശത്തിന്റെ നിഷ്കർഷത്തെ ഇതിനു താഴെ കാണിക്കാം. ആചാര്യനാൽ പഠിതങ്ങളായ സ്ഥാനങ്ങളെ ബിന്ദുക്കൾകൊണ്ടും അപഠിതങ്ങളായ സ്ഥാനങ്ങളെ രേഖകൾകൊണ്ടും അടയാളപ്പെടുത്തി അനന്തരം ഇഷ്ടങ്ങളായ ബിന്ദുക്കളേയും അനിഷ്ടങ്ങളായ രേഖകളേയും തമ്മിൽ അന്തരിക്കേണം. എന്നാൽ അധികമായി നിൽക്കുന്നത് യാതൊന്നോ അതിന്റെ അനുഭവത്തെ ഗ്രഹങ്ങൾ മേൽപ്പറഞ്ഞ കാലത്തിങ്കൽ അനുഭവിപ്പിക്കും. ഇത് നിഷ്കൃഷ്ടാർത്ഥമാകുന്നു. എട്ടു ബിന്ദുക്കൾ യാതൊരേടത്തു തികയുന്നുവോ അവിടെ സഞ്ചരിക്കുമ്പോൾ ശുഭഫലം സമ്പൂർണ്ണമായി ഭവിക്കും. ബിന്ദുക്കൾ നാലാകിൽ അർദ്ധഫലമെന്നും രണ്ടാകിൽ നാലിലൊന്ന് എന്നും, ആറാകിൽ മുക്കാൽ എന്നും ഇങ്ങനെതന്നെ രേഖാഷ്ടകം മുതലായതുകൊണ്ട് അശുഭഫലവിഭാഗവും ഗ്രാഹ്യമാകുന്നു. ശുഭമായിട്ടുള്ള ഫലം പുഷ്ടിഹീനമായിരുന്നാലും അതിനെ ദാനം ചെയ്യുന്ന ഗ്രഹം ഉപചയരാശി മുതലായ ശുഭസ്ഥലങ്ങളിലാകിൽ പുഷ്ടമാക്കി ചെയ്യും. അശുഭമായിട്ടുള്ള ഫലം മേൽപ്രകാരമായാലും അതിനെ ദാനം ചെയ്യുന്ന ഗ്രഹം അപചയരാശി മുതലായ അനിഷ്ടസ്ഥലങ്ങളിലാകിൽ അതിനെ പുഷ്ടമാക്കി ചെയ്യും. സ്വതഃപുഷ്ടമായിരിക്കുന്നതിനെ ഏറ്റവും പുഷ്ടിയോടുകൂടിയതാക്കി ചെയ്യും. ഉപചയ ഗൃഹമിത്രസോച്ചഗൈഃ എന്നതും അപചയഗൃഹനീചാരാതിഗൈഃ എന്നതും ഉപലക്ഷണമാകയാൽ സ്വക്ഷേത്രത്തിൽ നിൽക്കുന്ന ഗ്രഹമായാലും അവർ ഉപചയാദികളായ ഉക്തസ്ഥാനങ്ങളിലെന്നപോലെ ഫലവിശേഷ സമ്പാദനത്തെക്കുറിച്ചു സാമർത്ഥ്യത്തോടുകൂടിയവരായി ഭവിക്കുമെന്നും ഗ്രാഹ്യമാകുന്നു.  ഇങ്ങനെ പുത്രാർദ്ധനിഷ്കർഷം. 

ചൊവ്വയുടെ അഷ്ടകവർഗ്ഗം

വക്രസ്തൂപചയേഷ്വിനാൽ സതനയേ-

ഷ്വാദ്യാധികേഷൂദയാ-

ച്ചന്ദ്രാൽ ഷൾത്രിഫലേഷു കേന്ദ്രനിധന-

പ്രാപ്ത്യർത്ഥഗഃ സ്വാച്ഛ് ശുഭഃ

ധർമ്മായാഷ്ടമകേന്ദ്രഗോƒർക്കതനയാൽ

ജ്ഞാൽ ഷൾത്രിധീലാഭഗ-

ശ്ശുക്രാൽ ഷഡ്വ്യയലാഭമൃത്യുഷു ഗുരോഃ

കർമ്മാന്ത്യലാഭാരിഷു.

സാരം :-

ജനനകാലത്തിങ്കൽ സൂര്യനാൽ ആശ്രിതമായരാശിയുടെ അഞ്ചാം ഭാവത്തിലും മൂന്നാം ഭാവത്തിലും ആറാം ഭാവത്തിലും പത്താം ഭാവത്തിലും പതിനൊന്നാം ഭാവത്തിലും, ലഗ്നത്തിങ്കലും അതിന്റെ മൂന്നാം ഭാവത്തിലും ആറാം ഭാവത്തിലും പത്താം ഭാവത്തിലും പതിനൊന്നാം ഭാവത്തിലും, ചന്ദ്രനാൽ ആശ്രിതമായ രാശിയുടെ ആറാം ഭാവത്തിലും മൂന്നാം ഭാവത്തിലും പതിനൊന്നാം ഭാവത്തിലും, തന്നാൽ ആശ്രിതമായ രാശിയിലും അതിന്റെ നാലാം ഭാവത്തിലും ഏഴാം ഭാവത്തിലും പത്താം ഭാവത്തിലും എട്ടാം ഭാവത്തിലും പതിനൊന്നാം ഭാവത്തിലും രണ്ടാം ഭാവത്തിലും, ശനിയാൽ ആശ്രിതമായ രാശിയുടെ ഒമ്പതാം ഭാവത്തിലും പതിനൊന്നാം ഭാവത്തിലും എട്ടാം ഭാവത്തിലും കേന്ദ്രസ്ഥാനരാശികളിലും, ബുധനാൽ ആശ്രിതമായ രാശിയുടെ ആറാം ഭാവത്തിലും മൂന്നാം ഭാവത്തിലും അഞ്ചാം ഭാവത്തിലും പതിനൊന്നാം ഭാവത്തിലും, ശുക്രനാൽ ആശ്രിതമായ രാശിയുടെ ആറാം ഭാവത്തിലും പന്ത്രണ്ടാം ഭാവത്തിലും എട്ടാം ഭാവത്തിലും, വ്യാഴത്താൽ ആശ്രയിക്കപ്പെട്ട രാശിയുടെ പത്താം ഭാവത്തിലും പന്ത്രണ്ടാം ഭാവത്തിലും പതിനൊന്നാം ഭാവത്തിലും ആറാം ഭാവത്തിലും സഞ്ചരിക്കുന്ന ചൊവ്വ ശുഭനാകുന്നു. 

ഭാവാധിപനായ ഗ്രഹത്തിന്റെ ശത്രുക്ഷേത്രത്തിലും അതിശത്രുക്ഷേത്രത്തിലും അഷ്ടവർഗ്ഗത്തിൽ ശൂന്യമായി വരുന്ന രാശിയിലും

യുത്ഭാവേശസ്യാതിശത്രോർഗൃഹേ വാ

യോ വാ ഖേടോ ബിന്ദുശൂന്യർക്ഷയുക്തഃ

തത്തൽപാകേ മൂർത്തിഭാവാദികാനാ

നാശം ബ്രൂയാദ്ദൈവവിൽ പ്രാശ്നികായ.

സാരം :-

ഭാവാധിപനായ ഗ്രഹത്തിന്റെ ശത്രുക്ഷേത്രത്തിലും അതിശത്രുക്ഷേത്രത്തിലും അഷ്ടവർഗ്ഗത്തിൽ ശൂന്യമായി വരുന്ന രാശിയിലും നിൽക്കുന്ന ഗ്രഹങ്ങളുടെ ദശയിലോ അപഹാരത്തിലോ ആ ഭാവത്തിനു നാശമുണ്ടാകുമെന്നു ദൈവജ്ഞൻ (ജ്യോതിഷി) പൃച്ഛകനോടു പറഞ്ഞുകൊള്ളണം.

അഷ്ടവര്‍ഗ്ഗം എന്നാല്‍ എന്ത്?

 ദശാഫലങ്ങളും അപഹാരഫലങ്ങളും ശ്രദ്ധിക്കേണ്ട കാര്യങ്ങള്‍ ഏവ? എന്ന പോസ്റ്റിന്റെ തുടര്‍ച്ചയാണ് താഴെ കൊടുത്തിരിക്കുന്നത്. എവിടെ ക്ലിക്ക് ചെയ്യുക.

അഷ്ടവര്‍ഗ്ഗം എന്നാല്‍ എന്ത്?

  സൂര്യന്‍ മുതല്‍ ശനി വരെയുള്ള ഗ്രഹങ്ങളുടെ അഷ്ടവര്‍ഗ്ഗ രചനാരീതിയും സമുദായാഷ്ടവര്‍ഗ്ഗ രചനാരീതിയും അവയുടെ സാമാന്യ ഫലഭാഗവും ഈ website ല്‍ തുടര്‍ന്ന് വിവരിക്കുന്നതാണ്.  

   ഒരു ജാതകത്തിലെ ഗ്രഹനിലയെ ആസ്പദമാക്കി സൂര്യന്‍ മുതല്‍ ശനിവരെയുള്ള ഏഴു ഗ്രഹങ്ങളും തങ്ങളുടെ ചാരകാലത്ത് ആ ജാതകന് എന്തെല്ലാം ഗുണദോഷാനുഭവങ്ങളെയാണ് പ്രദാനം ചെയ്യുന്നതെന്നും, ലഗ്നം തുടങ്ങി 12 ഭാവങ്ങളിലും ഓരോ ഗ്രഹങ്ങള്‍ക്കുമുള്ള ബന്ധങ്ങളെന്താണെന്നും അവന്റെ ആയുസ്സ്, ഭാഗ്യം, ശുഭാശുഭകര്‍മ്മങ്ങള്‍ ചെയ്യേണ്ട പ്രത്യേക കാലങ്ങള്‍ തുടങ്ങിയുള്ളവകളേയും പ്രത്യേകം പ്രത്യേകം സൂക്ഷമമായി അറിയുന്നതിനുവേണ്ടി കണ്ടുപിടിച്ച് ഏര്‍പ്പെടുത്തീട്ടുള്ള ഒരു ക്രിയാവിഭാഗമാണ് " അഷ്ടവര്‍ഗ്ഗം" എന്ന് പറയുന്നത്.

   സൂര്യാഷ്ടവര്‍ഗ്ഗം, ചന്ദ്രാഷ്ടവര്‍ഗ്ഗം, കുജാഷ്ടവര്‍ഗ്ഗം, ബുധാഷ്ടവര്‍ഗ്ഗം, വ്യാഴാഷ്ടവര്‍ഗ്ഗം, ശുക്രാഷ്ടവര്‍ഗ്ഗം, മന്ദാഷ്ടവര്‍ഗ്ഗം ഇങ്ങനെ ഏഴു ഗ്രഹങ്ങള്‍ക്കും പ്രത്യേകം പ്രത്യേകം അഷ്ടവര്‍ഗ്ഗങ്ങളും ഉണ്ടായിരിക്കുന്നതാണ്. മേല്‍പ്പറഞ്ഞ അഷ്ടവര്‍ഗ്ഗങ്ങള്‍ എല്ലാം കൂടി ഒരുമിച്ച് കൂട്ടുന്നതിന് "സമുദായാഷ്ടവര്‍ഗ്ഗം" എന്ന് പറയുന്നു.

  ജാതകത്തിലെ "അഷ്ടവര്‍ഗ്ഗങ്ങള്‍, സമുദായാഷ്ടവര്‍ഗ്ഗങ്ങള്‍" എന്നിവ വ്യക്തിഗതാഗതമായ പ്രധാന ആവശ്യങ്ങളെയും , അവയ്ക്കുപറ്റിയ നല്ല സ്ഥലകാലങ്ങളെയും  സമയങ്ങളും അറിയിക്കുന്നു. കൃത്യമായ ഗണിച്ചെടുക്കുന്ന ജാതകഫലം അക്ഷരാര്‍ത്ഥം കൃത്യമായിതന്നെ അനുഭവിക്കുമെന്നിരിക്കെ അഷ്ടവര്‍ഗ്ഗങ്ങള്‍ ജാതകത്തില്‍ അത്യാവശ്യമാണ്. സമുദായാഷ്ടവര്‍ഗ്ഗം ഭാവിജീവിതത്തെ കണ്ണാടിയിലെന്നപോലെ വ്യക്തമാക്കുന്ന ഒന്നാണ്. 1 ഉം 1 ഉം 2  എന്നപോലെ ഭാവി ജീവിതഫലം കൃത്യമായി കാണാന്‍  ജാതകത്തിലെ അഷ്ടവര്‍ഗ്ഗങ്ങളും സമുദായാഷ്ടവര്‍ഗ്ഗങ്ങളും കൊണ്ട് കഴിയുന്നു 

   അഷ്ടവര്‍ഗ്ഗമെന്നാല്‍ ആദിത്യന്‍, ചന്ദ്രന്‍, ചൊവ്വ, ബുധന്‍, വ്യാഴം, ശുക്രന്‍, ശനി, എന്നീ ഏഴു ഗ്രഹങ്ങള്‍ക്കും ലഗ്നത്തിനും ലഗ്നത്തിനും കൂടി വരുന്ന വര്‍ഗ്ഗം അഥവാ അക്ഷം എന്നര്‍ത്ഥമാകുന്നു. അക്ഷം എന്നതിന് സംഖ്യ എന്നും ഒരക്ഷരമെന്നാല്‍ ഒന്ന് എന്നും അര്‍ത്ഥം ഗ്രഹിച്ചുവരുന്നു. 

  അഷ്ടവര്‍ഗ്ഗം കണ്ടുപിടിക്കുന്നത് ഒരു ജാതകത്തിലെ ഗ്രഹനിലയെ അടിസ്ഥാനമാക്കിയാണെന്ന് നേരത്തെ പ്രസ്താവിച്ചിട്ടുണ്ടല്ലോ. അതനുസരിച്ച് ഓരോ ഗ്രഹങ്ങള്‍ക്കും പ്രത്യേകം പ്രത്യേകം രാശിചക്രം വരച്ചു അതുകളില്‍ അഷ്ടവര്‍ഗ്ഗങ്ങളെ രേഖപ്പെടുത്തണം. സാധാരണ ജ്യോത്സ്യന്മാര്‍ ഓരോ കവടിയെ ഓരോ രാശികളിലും വച്ചിട്ടാണ് അഷ്ടവര്‍ഗ്ഗം രേഖപ്പെടുത്തി കണക്കാകാറുള്ളത്. നമുക്ക് അതിന് പകരം ഓരോ രാശികളിലും ഓരോ അടയാളങ്ങള്‍ ഒന്നുപോലെ ഇട്ടിട്ട് ഒടുവില്‍ കണക്കാക്കിക്കൊണ്ടാല്‍ മതിയാകുന്നതാണ്.

   അഷ്ടവര്‍ഗ്ഗം നിര്‍മ്മിക്കുന്നത് ജനനസമയത്തിന് ഗണിച്ചെടുത്ത ജാതകത്തിലെ ഗ്രഹസ്ഥിതിയ്ക്ക് അനുസൃതമായിട്ടാണ്. ഓരോ ഗ്രഹങ്ങള്‍ക്കും അവ നില്‍ക്കുന്ന രാശിയില്‍ നിന്ന് ഇന്ന ഇന്ന രാശികളില്‍ അക്ഷം വരുമെന്ന് പ്രത്യേകം വ്യവസ്ഥ ചെയ്യപ്പെട്ടിട്ടുണ്ട്. അതനുസരിച്ച് അതാതു രാശികളില്‍ ഓരോ അക്ഷസംഖ്യ അടയാളപ്പെടുത്തണം. അങ്ങനെ സൂര്യന്‍ മുതല്‍ ലഗ്നമടക്കമുള്ള ഗ്രഹങ്ങള്‍ക്ക്‌ പറയപ്പെടുന്ന രാശികളില്‍ ഓരോ അക്ഷം അടയാളപ്പെടുത്തി അവസാനം ഓരോ രാശിയിലെയും അക്ഷങ്ങളെ ഒന്നിച്ച് കൂട്ടിയെഴുതണം. (ആ കൂട്ടിയെഴുതിയ സംഖ്യമാത്രമേ ജാതകത്തില്‍ രേഖപ്പെടുത്തുവാന്‍ പാടുള്ളൂ.) പിന്നീട് 12 രാശിയിലെയും, അക്ഷങ്ങള്‍ ഒന്നിച്ച് കൂട്ടിയാല്‍ സൂര്യാഷ്ടവര്‍ഗ്ഗത്തില്‍ 48 ഉം, ചന്ദ്രാഷ്ടവര്‍ഗ്ഗത്തില്‍ 49 ഉം, കുജാഷ്ടവര്‍ഗ്ഗത്തില്‍ 39 ഉം, ബുധാഷ്ടവര്‍ഗ്ഗത്തില്‍ 54 ഉം, വ്യാഴാഷ്ടവര്‍ഗ്ഗത്തില്‍ 56 ഉം, ശുക്രാഷ്ടവര്‍ഗ്ഗത്തില്‍ 52 ഉം, മന്ദാഷ്ടവര്‍ഗ്ഗത്തില്‍ 39 ഉം സമുദായാഷ്ടവര്‍ഗ്ഗത്തില്‍ 337 ഉം അക്ഷങ്ങള്‍ ഉണ്ടാകും. ഇതാണ് അഷ്ടവര്‍ഗ്ഗ പ്രക്രിയയുടെ സാമാന്യനിയമം.

 സൂര്യാഷ്ടവര്‍ഗ്ഗം കണ്ടുപിടിക്കുന്നത് എങ്ങനെ? എന്ന പോസ്റ്റ്‌ തുടര്‍ന്ന് വായിക്കുക. ഇവിടെ ക്ലിക്ക് ചെയ്യുക.