. . ഹരിശ്രീ ഗണപതയെ നമഃ അവിഘ്നമസ്തു ശ്രീ ഗുരുഭ്യോ നമഃ നവഗ്രഹേഭ്യോ നമഃ . .
ശനിദശയിലെ കേതുവിന്റെ അപഹാരകാലം
മരുദഗ്നിപീഡനമരിവ്യസനം
സുതദാരവിഗ്രഹയുതിസ്സതതം
അശുഭാവലോകനമഹേശ്ച ഭയം
ശനിവത്സരാൻ ശിഖിനി ചാപഘൃതേ.
സാരം :-
ശനിദശയിലെ കേതുവിന്റെ അപഹാരകാലം കാറ്റ്, തീയ് (വാതം, ഉഷ്ണം) ഇവയിൽ നിന്ന് ഉപദ്രവവും ശത്രുപീഡയും ഭാര്യാപുത്രകലഹവും അശുഭദർശനവും സർപ്പഭയവും സംഭവിക്കും.
കേതുവിന് മാരകസ്ഥാനസംബന്ധമുണ്ടായാൽ ദോഷശാന്ത്യർത്ഥം ഛാഗദാനം, ഗജദാനം എന്നിവ യഥാശക്തി ചെയ്കയും വേണം.
ശനിദശയിലെ ബുധന്റെ അപഹാരകാലം
സുഭഗത്വമസ്തി സുഖിതാ വനിതാ-
നൃപലാളനം വിജയമിത്രയുതിഃ
ത്രിഗദോത്ഭവസ്സഹജപുത്രരുജാ
ശനിദായഹാരിണി ശശാങ്കസുതേ.
സാരം :-
ശനിദശയിലെ ബുധന്റെ അപഹാരകാലം സൗഭാഗ്യവും സമ്പത്തും സുഖവും സ്ത്രീഭോഗവും രാജപ്രസാദവും കാര്യാദികളിൽ ജയവും ബന്ധുയോഗവും ത്രിദോഷം (വാതപിത്തകഫ) കോപവും സഹോദരനും പുത്രനും രോഗാദ്യരിഷ്ടയും സംഭവിക്കും.
ബുധന് മാരകസ്ഥാനസംബന്ധമുണ്ടായാൽ ദോഷശാന്ത്യർത്ഥം വിഷ്ണുസഹസ്രനാമജപവും യഥാശക്തി അന്നദാനവും ചെയ്യണം.
ചന്ദ്രൻ കർക്കിടകം രാശിയിൽ നിന്നാലത്തെ ഫലം പറയുന്നു
ആവക്രദ്രുതഗസ്സമുന്നതകടിഃ
സ്ത്രീനിർജ്ജിതസ്സൽസുഹൃ-
ദ്ദൈവജ്ഞഃ പ്രചുരാലയഃ ക്ഷയധനൈ-
സ്സംയുജ്യതേ ചന്ദ്രവൽ
ഹ്രസ്വഃ പീനഗളസ്സമേതി ച വശം
സാമ്നാ സുഹൃദ്വത്സല-
സ്തോയോദ്യാനരതസ്സ്വവേശ്മസഹിതേ
ജാതശ്ശശാങ്കേ നരഃ
ജനനസമയത്തു കർക്കിടകം രാശിയിൽ ചന്ദ്രൻ നിന്നാൽ, കുറച്ചൊന്നു ചരിഞ്ഞും വേഗത്തോടുകൂടിയും നടക്കുന്നവനായിരിക്കും, അരക്കെട്ടു സാധാരണയിൽ അധികം ഉയർന്നിരിയ്ക്കുക, സ്ത്രീകൾക്കു അധീനനാവുക, സജ്ജനങ്ങൾ മാത്രം ബന്ധുക്കളായിരിയ്ക്കുക, ജ്യോതിശ്ശാസ്ത്രത്തിൽ നല്ല പാണ്ഡിത്യമുണ്ടാവുക, തന്റെ വകയായി അനേക ഭവനങ്ങളുണ്ടായിരിയ്ക്കുക, കറുത്ത പക്ഷത്തിലേയും വെളുത്ത പക്ഷത്തിലേയും ചന്ദ്രനെപ്പോലെ ചിലപ്പോൾ ക്രമത്തിൽ ക്രമത്തിൽ സമ്പന്നനും ചിലപ്പോൾ നിർദ്ധനനുമായിത്തീരുക, ശരീരത്തിനു ഉയരം കുറഞ്ഞിരിയ്ക്കുക, കഴുത്തിനു നല്ലവണ്ണമുണ്ടാവുക, ചതുരുപായങ്ങളിൽ സാമോപായം മാത്രം സ്വാധീനത്തിലാവുന്നവനായിരിയ്ക്കുക; ബന്ധുക്കളെ ഏറ്റവും സ്നേഹിയ്ക്കുന്നവനും ജലക്രീഡയിലും ഉദ്യാനവാസത്തിലും വളരെ താല്പര്യമുള്ളവനുമായിരിയ്ക്കുക; ഇവയെല്ലാമാണ് അനുഭവിക്കുക.